Badral's personal blog
Интернет миний ертөнцийг хардаг цонх …

Archive for the ‘Линүкс’ Category

Raw data recovery

Sunday, March 6th, 2011

Өнгөрсөн долоо хоногт gparted-р 100GB хэмжээтэй EXT3 партишныг NTFS рүү хөрвүүлээд хэмжээг нь нэмэх тушаал өгч орхитол баларсан юм болов. ~80GB өгөгдөл нь хэрэгтэй өгөгдөл байсан юм. Гэвч зураг, видео нь ч дүүрч. Гол нь эхнэрийн маань хийж байсан ~2500 мөр өгөгдөл бүхий 3 хавтас хүснэгттэй Openoffice-н Calc файлыг нөөц хийж аваагүй байжээ. Үүнийг л тэр чигээр нь хаяж болохгүй байлаа. Ингээд тэрхүү чухал файлыг сэргээхээр бүхий л Testdisk, Stellar Phoenix, EASEUS, Disk Internal, R-Studio, Professional Recover-Center гээд боломжит бүхий л хэрэгслээр 5 хоног үзээд дийлсэнгүй. Ажилдаа явахдаа шалгуулаад эхэлдэг ирээд л шалгаад л нухдаг байдаггүй.
Ингээд өнөөдөр аргаа бараад хуучин ДОС үйлдлийн системийн үед л Diskedit гээд программаар гараар засдаг байсан шигээ нухаад суулаа. Нөгөө партишнаа NTFS-рүү шилжүүлсний дараа ямар ч гэсэн анхны эвдэрсэн хэлбэр юм даа гээд dd image хийгээд авсан байсан юм. Тэрхүү ~100GB орчим имэж файлаа нээх HEX Editor-ийн эрэлд гарлаа. Тэрхүү том файлыг нээгээд хайлт хийчхээр төлбөргүй засварлагч байдаггүй юм байна. Ингээд нэлээн олон янзын эдээр оролдсоны эцэст WinHex дээр буулаа. Ингээд үзүүлбэр хувилбараар нь нөгөө файлаа нээгээд үзтэл нөгөө том файлыг үнэхээр төвөггүй нээж байна. За ингээд л vnd.oasis.opendocument.spreadsheetPK түлхүүрээр хайлт хийгээд явлаа. Азаар эхнээс нь 4 дэх файлд нөгөө .ods файл маань байгаа шиг санагдав. Учир нь хэмжээ нь ~ 800Kb байсан юм. Тухайн файл тийм хэмжээтэй гэдгийг өмнө нь Stellar Phoenix -р мэдэж авсан байлаа. Ингээд нөгөө файлаа тасалж аваад (туршилтын хувилбар нь зөвхөн 200Kb-г л зөвшөөрдөг юм билээ. 4 удаа хуулж авав.) .ods файлаар хадгалаад ОпенОфис-р нээх гэтэл алдаа заагаад явсангүй.
ОпенОфисын опендокумент формат нь ZIP байдаг билээ. Ингээд .ods-ээ .zip болгож нэрлээд задлах гэтэл алдаа заагаад задарсангүй. Ингээд Object Fix Zip (төлбөргүй), Advanced Zip Repair (үзүүлбэр), засах гэж үзээд нэмэр болсонгүй. Нэг нь зүгээр л Error, нөгөө нь амжилттай заслаа гэсэн боловч CRC error гэсэн мэдээлэл өгөөд нээж болсонгүй. Ингээд ахиад нөгөө файлаа ухаж байтал ZIP файлд байж боломгүй нэлээн олон 0 бүхий хэсэг олдов. Үнэхээр ямар нэг хог бүхий блок орж ирсэн байлаа. EXT3 дээр өгөгдмөл блокийн хэмжээ 4096 байдаг тул түүнийг өнөө тэгүүдийн сүүлчээс эхлэн урагш нь яг тэрхүү хэмжээгээр тасалж хаялаа. Ингээд 7zip-р ахиад задлаад үзтэл алдаатай боловч задарсан байнаа. Нөгөө чухал файл маань ч мөн болох нь мэдэгдэв. Гэтэл гол content.xml файл маань эвдрэлтэй байлаа. Хагас задарсан хэсгийг нь нээгээд үзтэл эхний хүснэгтийн 100 орчим мөр зөв явж байгаад цаашаа холион бантан болжээ. Ингээд ахиад WinHex-ээрээ edit хийж төгсгөлд нь дутсан 4 байтыг нэмж, нөгөө хассан блок дээрээ нэмээд эхлэл рүү нь дахин 8 байт устгаад ахин архиваа нээж үзтэл алдаагүй нээгдлээ. Ингээд шууд .ods болгоод ОпенОфисоороо нээхэд бүрэн сэргэсэн байлаа. Ингээд өнөөдөр ч нөгөө төсөөлөхөд бэрх болсон гар арга маань тэр мундаг мэргэжлийн гээд байдаг хэрэгслүүдээс илүү үр бүтээлтэй хэвээрээ байгаа юм байна. Гараараа ойролцоогоор 3 цаг ноцолдож байж сэргээжээ.
Ташрамд дурдахад дээрх бүх хэрэгслийн ихэнх нь NTFS-н доор устсан EXT3 байна гэдгийг таниагүй бөгөөд ганц нэг таньсан нь хэдэн алдаатай jpg файл сэргээснээс хэтрээгүй болно.
Харин WinHex-д үнэхээр талархаад баршгүй. Баярласан сэтгэлээ илэрхийлж ирэх долоо хоногт ядаж private хувилбарыг нь худалдаж авнаа.
Gparted-р гэлтгүй ямар ч партишн засварлагчаар файлын систем хөрвүүлэх бол залхууралгүй бүх өгөгдлөө өөр диск рүү хуулж тавьж байгаад хийж баймаар юм байна шүү.

Clean upgrade/reinstallation of debian/ubuntu with minimal effort

Monday, January 10th, 2011

Өнөөдөр нэг дебиан сервер нүүлгэх хэрэгтэй болов. Хэрэглэж байсан бүх програм хэрэглэгдэх бөгөөд харин эвдэрсэн зарим тохиргоо болон хэрэглэгчдийн хуучин өгөгдлүүдийг шилжүүлэх хэрэггүй байв. Тиймээс шууд имаж хийгээд хуулчихаж болохгүй байлаа. Ингээд нэлээн дээр үед хэрэглэж байсан нэгэн аргаа ашиглав.
Хэрэв та ашиглаж байгаа системээ шинэ сервер/компьютер рүү нүүлгэх хэрэг гарвал шинэ системээ минимал тохиргоогоор суулгаж байгаад дебиан/Үбүнтү -гийн хувьд дараах тушаалыг өгөөд л болно. Магадгүй нэлээн хэдэн жилийн өмнө би доорхи тушаалуудыг блогтоо бичиж байсан ч байж магадгүй. Мартсан тул юу ч гэсэн ахиад биччихлээ.

Суусан бүх програмын нэрийг дараах тушаалаар аваад
dpkg -l | awk ‘{print $2}’ > installed_packages.txt

шинэ систем рүүгээ installed_packages.txt -ээ хуулж байгаад дараах тушаалыг ажиллуулна.
apt-get install `cat installed_packages.txt`

Ердөө ингээд л болоо.

Mongolian terminology project started

Tuesday, March 23rd, 2010

За нэгдсэн орчуулгын порталд Terminology төсөл үүсгэчихлээ. Ямар ч програм хангамжийн орчуулгын төслийг нэр томьёоны нэгдсэн сангүйгээр чанартай орчуулна гэдэг бараг бүтэшгүй зүйл. Энэхүү төсөлд одоогоор зөвхөн Гномийн нэр томъёог үүсгэн оруулсан бөгөөд цаашид ОпенОфис.орг, КДЭ-г нэмэх төлөвлөгөөтэй байна.
Бүх нээлттэй системүүдийг нэгтгээд нэг сан болгох гэснээ хамаагүй холих тийм ч зөв бус санагдаад тус тусад нь төсөл төслөөр нь нэмээд явсан нь дээр санагдлаа. Гэхдээ Гноме КДЭ зэрэг ойролцоо төслүүдийн нэр томьёог үүсгэхдээ мэдээж аль түрүүлж үүссэнээс нь аваад үүсгээд явах болно.

Mongolian Localization of Open Source projects

Thursday, March 18th, 2010

Сүүлийн хэдэн жил ОпенМН баг чимээгүй болсноор нээлттэй эх бүхий програм хангамжийг монгол хэл рүү орчуулах ажил үндсэндээ зогссон билээ. Энэ тэнд ч нэлээн хэдэн оролдлогууд гарсан ч нүдэнд харагдаж, гарт баригдах дорвитой зүйл ажиглагдсангүй. Жоомла-г Алтансүх тэргүүтэй андууд орчуулсныг эс тооцвол Launchpad, Limnux зэрэг дээр ганц нэгхэн жижигхэн програмын орчуулга хийх оролдлогуудаас илүү гарсан зүйл харагдахгүй байна.
Би ОпенМН баг монгол орчуулгуудыг хянах чадвар боломж байхгүй боллоо гэж үзэн тарааж, орчуулга хийхээр хандаж байсан хүмүүсийг бусад газарт байгаа орчуулга хийж буй хүмүүс рүү нэгд гэж явуулж байсан билээ. Гэвч зөв алхам байсангүй.
ОпенМН зөвхөн ОпенОфисын орчуулгаа л гардаж хийсэн нь дээр хэмээн үзэж байв.
Гэтэл энэ тэнд хийсэн ганц нэг ч болсон үгийн орчуулгууд эх төслийнхөө ч Агуулах руу нэгтгэгдэхгүй орхигдож байгаад хамарсан ямар ч гэсэн нэг нэгдсэн орчуулга хийчих вэб үүсгэх нь зөв хэмээн үзэж Pootle ашиглан ОпенМН-ы вэб орчуулгын системийг үүсгэлээ. http://trans.openmn.org хаяг руу орж та бүхэн орчуулгаа хийж байгаарай. Ганцхан үг ч байсан та хаа хамаагүй оруулснаас, энэ систем рүү оруулахад, сар сардаа эх төслүүд рүүгээ нэгтгэгдэн ороод үр дүн нь харагдаад явах болно.
Одооноос эхлэн энэ тэнд байгаа бүх орчуулга хийх сонирхолтой хүмүүсийг нэгэн дээвэр доор нэгтгэхээр шийдлээ.Таны нэгдэх газар http://trans.openmn.org
ОпенМН баг монголдоо анхдагч байсан болоод ч тэр үү бүү мэд нэгэнт танигдсан, хийсэн зүйлтэй, хүмүүсийн хандлага үргэлж эерэг байсан тул шинээр линүкс.мн -р нэгтгэсэнээс илүү үр дүнтэй юм байна хэмээн ийн шийдлээ.
Хэрэв та firefox ашиглаж байвал http://mnspell.openmn.org/ хаягаар орж монгол хэлний дүрмийн алдаа шалгагчаа суулгаад http://trans.openmn.org хаягаар орж Gnome, KDE, OpenOffice болон бусад GNU програмуудыг эх хэл рүүгээ онлайнаар орчуулах боломжтой боллоо.
Хэрвээ танд тогтмол интернет холболт байхгүй бол татаж авч орчуулаад http://trans.openmn.org систем рүү илгээх боломжтой.
Би өөрөө татаж аваад орчуулга хийхийг эрхэмлэдэг тул та бүхэнд ч бас энэ нь илүү тухай байх гэж бодож байна. Тэгж орчуулга хийхэд Kbabel, Poedit, Virtaal, Gtranslator, WordForge гээд олон системүүд байдаг. Миний хувьд kbabel-ыг хамгийн илүүд үздэг. Харамсалтай нь энэ нь линүкст зориулсан KDE дэргэцийн системийн хэрэгсэл боловч та KDE-г тэр чигээр нь виндовс дээр суулгаад хэрэглэх боломжтой. Суулгахдаа KDE-Base Apps, Lokalize болон Aspell-mn-ыг сонгосон байх хэрэгтэй. Эсвэл та виндовс дээр хялбарханаар PoEdit, virtaal-г хэрэглэж болно.
Нэмэлт:
Зарим хүмүүс guush.mn, toli.dusal.mn, itdic.edu.mn, guush.mn чөлөөтэй оролцох МТ толь бичиг, limnux.org launchpad.net гэх зэрэг онлайн орчуулгын системүүд болон асар олон зүйл байхад ийм зүйл хийж яадаг байна гэж үзэж байж магадгүй юм.
Тэгвэл тэр олон системийн хаана нь би орчуулга хийхээ мэдэхгүй байдалд орсон тул нэгтгэхээр шийдсэн юм.
Орчуулга хийхэд Launchpad.com л арай найдвартай юм болов уу гэж бодоод ганц нэг гноме орчуулга туршилтын журмаар хийсэн чинь орчуулгууд Гномийн үндсэн агуулах руу ороогүй байсан нь урам хугалсан юм.
Эрдээ эгч ч (би Эрдэнэчимэг багшийг ингэж хэлээд заншчихжээ) гандан буурахгүй энэ тэндгүй л орчуулга хийгээд, мөн энэ тэндэхийн орчуулгын тухай форумууд руу ч бичээд яриад явах юм. Надад тийм сонирхол, цаг зав гарахгүй юм.
Ийм хүмүүс мөн олон байгаа цаашид ч олширох юм шиг байна гэж бодоод http://trans.openmn.org -г үүсгэсэн билээ.

Wubi? No thanks!

Friday, February 19th, 2010

Сүүлийн үед монголд залуучууд Үбүнтү (Ubuntu) гэж овоо ярьж бичдэг болжээ. Гэхдээ харамсалтай нь Wubi хэрэглэж суулгаж ашиглаад магтаад байх юм. Энэ бол ёстой хэрэггүй, бүтэхгүй эд. Учир нь Wubi-гээр суулгасан Ubuntu үйлдлийн систем виртуал файлын системээр ажилладаг! Хялбархан хэлбэл Виртуал машинаас сүртэй ялгарах зүйл байхгүй. Файлын системээ виртуал файл системээр суулгадаг. Эхлэхдээ асар уднаа гэсэн үг. Диск имежээ задлаж тавиад дэлгэж уншинаа гэсэн үг.
Мөн ямар нэг кернел эсвэл системийн шинэчлэлт хийхэд асуудал гарах магадлал өндөр. Учир нь Виндовс эхлүүлэгчид Үбүнтү цөмөө зааж өгдөг. Гэтэл Үбүнтү өөрөө стандартаар GRUB booter ашигладаг тул шинэчлэл хийсний дараа тооцоолуур тань эхлэхгүй байхад гайхах зүйл байхгүй.
Виндовс дээр ингэж суулгасан Үбүнтү-гээс Үбүнтү дээрээ виртуалбокс (Virtual box) суулгаад тэр дотроо виндовс суулгаад ажилласан нь илүү хурдан байх болно!
Мөн энэ дашрамд ам нээсэн дээрээ нэг зүйл хэлчихэд энгийн хэрэглэгчид Линүкс ашиглахад вирустэнэ гэсэн зүйл байхгүй амар мэт ойлгоод байх шиг байгаам. Үгүй ээ, вирустэхийн хувьд вирустэнэ. Линүксд зориулж бичсэн вирус одоо эрчимтэй нэмэгдэж байна. За ингээд хэлчихээр хүмүүс бас за за ялгаагүй зөндөө линүкс вирус гараад ирэхээр виндовсоос ялгаагүй гацаж гөлийгөөд явуургүй болох эд байна гээд унадаг. Бас ийм бишээ, вирустэх нь гайгүй! Линүкс кернел, файл систем зэрэг нь маш сайн програмчлагдсан! Тиймээс виндовсынх шиг олон вирус гарч ирэхэд тун хэцүү бөгөөд гараад ирлээ гэхэд рүүт эрхээр ажиллаагүй тохиолдолд үндсэн системд сүртэй аюул учруулж чадахгүй. Ямар ч гэсэн монголд хамгийн өргөн дэлгэр болсон форматлах гэдэг асуудал бол бараг гарахгүй дээ. Миний энэ муу навсгар лаптоп дээр Hardy Heron 2008 оноос хойш л явлаа. Форматлах хэрэг гарсангүй өдий хүрлээ дээ.

Architecture of the Linux Operation systems

Sunday, May 10th, 2009

За 2003 онд Соёмбо үйлдлийн систем гээч зүйл гаргах гэж ганцаараа нэлээн үйлээ үзэж байж нэг бета хувилбар гэгч зүйл гаргаад орхисоныг та бүхнээс зарим нэг нь санаж байгаа байх. Сүүлийн үед дахин сэргээж хөгжүүлэхээр зориг шулуудан дайрч оров. Гэхдээ энэ удаад соёмбо системийн талаар бус тухайн үед ноцолдож байсны хувьд санаанд үлдсэн линүкс үйлдлийн системийн архитектурын талаар цухас дурдая гэж бодоод энэ бичлэгийг үүсгэв.
ГНУ/Линүкс үйлдийн системийн архитектурыг маш ерөнхий авч үзье. Линүкс үйлдлийн системийн гол хэсэг нь Линүс Торвалдсын бүтээсэн Линүкс цөм юм. Энэхүү цөм нь техник хангамжууд жишээлбэл санах ой, төв процессор (процессорын төлөвлөгчөөр), КД хөтлөгч болон бусад гадаад төхөөрөмжүүд рүү хандах холбоос болж өгдөг. Бүрхүүл буюу shell нь хэрэглэгчдийг цөмтэй холбох гүүр болж өгдөг. Өөрөөр хэлбэл бүрхүүл нь хэрэглэгчийн өгсөн тушаалуудыг хүлээж авч зохих үйлдлийг (жишээлбэл програмыг ачаалах ажиллуулах) гүйцэтгэдэг. За тэгээд эцэст нь хэрэглээний програмууд нийлж энэхүү цогц үйлдлийн системийг бүрдүүлнэ. Цонхны удирдлагын системүүд, вэб хөтөч, програмчлалын хэл хэрэгслүүдгүйгээр үйлдлийн системийг төсөөлөх аргагүй. Тиймээс зүгээр л линүкс үйлдлийн систем бус ГНУ линүкс үйлдлийн систем хэмээн нэрийдэх нь зүйтэй бөлгөө.

Линүксийн цөмд бүх техник хэрэгслүүдийн драйверууд агуулагддаг. За тэгээд цааш нь жаахан лавшруулаад авч үзвэл:

Үндсэнд нь энэ үйлдийн системийг програм хангамжийн хоёр орон зайд авч үзэх боломжтой.
1.Хэрэглэгчийн програмууд болон бусад програмын хэрэгслүүд (бүрхүүлийг оруулаад)
2.Үйлдлийн системийн цөм ба түүнд хамаарах бүрдэл хэсгүүд
Эхний орон зайн хувьд хэрэглэгчийн програм буюу процесс бүр харилцан хамааралгүй хувийн (ямар нэг процесстэй хамтран эзэмшихгүй) санах ойн хаяглалттай байдаг. Харин цөм нь өөрийн гэсэн тусдаа санах ойн хаяглалттай бөгөөд үүнийг цөмийн бусад бүрдэл хэсгүүд хамтран эзэмшдэг. Тиймээс цөмийн ямар нэг бүрдэл хэсэг санах ойн буруу заалтууд үүсгээд орооцолдож эхэлбэл “Kernel panic” гэсэн мэдээ илгээгээд цөм тэр чигээрээ гацдаг. Та линүкс дээр ямар нэг техникийн драйвер хийгээд ачаалагдах боломжтой модуль руу ачаалсны дараа туршилт хийж үзэж байсан бол энэ Kernel panic мэдээг сайн мэдэж байгаа байх. Хэрвээ анхныхаа оролдлогоор огт алдаагүй бичиж чадсан тийм мундаг биш бол шүү дээ. 😉
Дээрх зурагт байгаа цөмийн хамгийн доод төвшинд “Архитектураас хамааралтай кодууд” ямар учиртай юм бол гэж та бодож байж болох юм. Энэ нь процессорын бүл (MMX, I386 гэх мэт) мөн техник хангамжийн зурвасууд (DMA гэх мэт. Жич. interface-ийг зурвас гэж орчууллаа.-хилийн зурвас гэдэг шиг утгаар) санах ойн зурвасууд (MMU setup), тасалдалууд гэх мэт тусгай элементүүдэд зориулагдсан кодууд болно. Энэхүү кодуудыг цөмийн эх кодны модны

kernel/arch

лавлах дотроос олох боломжтой.
За ингээд цааш линүкс үйдлийн системийг бүрдүүлж байгаа гол сан бол GNU C library буюу glibc юм. Энэ нь хэрэглээний програмууд зохиоход линүкс цөм рүү хандах функцүүдээр хангана. Энэ санд би монгол хэлний локалын дэмжилтийг 2002 онд билүү хийж байсан санагдана. Залхуу хүрчихлээ. Дараа зав гараад дур хөдөлбөл цааш үргэлжлүүлье.

Thank you, TestDisk

Tuesday, December 2nd, 2008

За ойрын үед соёмбо линүксээ цааш хөгжүүлмээр санагдаад болдоггүй. Тиймээс gparted хэрэглэн шинэ 2 партишн үүсгээд нэг дээр нь хөгжүүллийн орчин нөгөө дээр нь соёмбо линүксийн шалгалт хийх санаатай үүсгэв. Ингээд гарах гээд цэсэн дээгүүр гүйлгэтэл Set Disklabel нүдэнд тусав. За ер нь ялгахад амар тэмдэглээс хийчие гэж бодоод тушаал өгтөл байхгүй бүх партишнийг устгачихлаа. 🙁 Урьд нь янз бүрийн хөгжүүлэлд (ОпенОфис.орг, ОпенМН нутагшуулалт гээд) зориулсан нийт 10 партишн байсан тул нэмээд үүсгээд байхаар сүүлдээ партишн залгахад толгой эргээд байдаг нь зовлонтой. За энэ ч яахав. За тэгээд сандарсандаа сэргээхээр шууд fdisk ажиллууллаа. Байдаггүй. За линүкс дээр юу байдаг билээ гээд бодлоо. Уг нь яг файл устгасан биш партишн хүснэгт л устсан тул (маш хурдан устгасан тул найдвартай мэдэгдсэн) боломж байгаа нь гарцаагүй. Гол нь мэдээлэл 100% л байх хэрэгтэй байна. Гэтэл дээр үед syslinux шуудангийн жагсаалтаар санагдана нэг TestDisk-ийн тухай мэйл ирж байсан санагдаад суулгаад ажиллууллаа. Ердөө 30 секунтын дотор сэргээчихлээ. Ура!
TeskDisk танд баярлалаа! Танд ч бас хэрэг болж юуны магад гэж бодоод энэ бичлэгийг яаран нэмлээ.

Stable root device UUID

Friday, November 7th, 2008

Та хэрэв Үбүнтү хэрэглэдэг бол үүнийг мэдэж байгаа байх. Хэрвээ системээ шинэчлэх ч юмуу өөр хатуу диск залгах үед дискнийхээ UUID мэдэх хэрэг гардаг. Тэгвэл та:

sudo /lib/udev/vol_id /dev/шалгах диск (hdaX/hdbX/sdaX/sdbX ..) | grep UUID

тушаал хэрэглэж болно.

I tend to think flashplugin-nonfree has a bug!

Tuesday, October 21st, 2008

Сүүлийн үед Firefox-г minimize (и) хийх үед зөөврийн компьютер маань нэг бол шууд шинээр эхлээд нэг бол шинээр эхлүүлэхээс өөр аргагүй болоод xwindows-с гарчихаад байв. Хэрэглэгчийн протоколлыг үзтэл:

Oct 20 20:07:50 badaa-laptop dhcdbd: Started up.
Oct 20 20:07:53 badaa-laptop dhcdbd: message_handler: message handler not found under /com/redhat/dhcp/eth0 for sub-path eth0.dbus.get.reason
Oct 20 20:08:56 badaa-laptop dhcdbd: message_handler: message handler not found under /com/redhat/dhcp/wlan0 for sub-path wlan0.dbus.get.reason
Oct 20 20:09:07 badaa-laptop dhcdbd: message_handler: message handler not found under /com/redhat/dhcp/wlan0 for sub-path wlan0.dbus.get.host_name
Oct 20 20:09:07 badaa-laptop dhcdbd: message_handler: message handler not found under /com/redhat/dhcp/wlan0 for sub-path wlan0.dbus.get.domain_name
Oct 20 20:09:07 badaa-laptop dhcdbd: message_handler: message handler not found under /com/redhat/dhcp/wlan0 for sub-path wlan0.dbus.get.nis_domain
Oct 20 20:09:07 badaa-laptop dhcdbd: message_handler: message handler not found under /com/redhat/dhcp/wlan0 for sub-path wlan0.dbus.get.nis_servers
Oct 20 20:09:07 badaa-laptop dhcdbd: message_handler: message handler not found under /com/redhat/dhcp/wlan0 for sub-path wlan0.dbus.get.interface_mtu

алдаа өгсөн байв. Ингээд dbus, wlan manager, dhcdbd -с алдаа хайж гарлаа. Нэмэр болсонгүй. Гэтэл уржигдар санамсаргүй сүлжээний кабелаар холбогдоод сууж байтал энэ асуудал ахин гарав. Протоколл нь хэвээрээ. Ингээд алдааг firefox-с хайж эхлэв: Юуны өмнө миний сэжиг флэш тоглуулагч байсан тул flashplugin-nonfree -г устгаж оронд flash player 10-г adobe-н сайтаас авч суулгаж үзэв. Үүнээс хойш энэ асуудал арилав. Протоколл нь хаяа бичигдсэн харагдавч шинээр эхлэх, үхлүүт гацах гэсэн хүнд алдаа ямар ч гэсэн арилав. Танд бас ийм асуудал гарвал дараахыг хийгээрэй.

sudo apt-get remove –purge flashplugin-nonfree
wget http://fpdownload.macromedia.com/get/flashplayer/current/install_flash_player_10_linux.deb
dpkg -i install_flash_player_10_linux.deb

Weblog of Linus Torvalds

Monday, October 13th, 2008

За Линүксийн загалмайлсан эцэг болох Линүс Торвалдс (Linus Torvalds) хувийн блогоо нээжээ. Тэрээр энэ блогтоо гэр бүл, хувийн амьдралаа бичих бодолтойгоо дурдсан байна. Мөн өөрийн зохиосон системийнхээ талаар бичихгүй өнгөрнө гэж юу байхав, хэдийнэ бичээд эхэлжээ. Блогийн хаяг нь http://torvalds-family.blogspot.com/ Хааяа ороод гарчиглачихаж байхад буруудахгүй л байх. 😉